قلت له بعد أن إلتقينا في الشارع: وينك عمي .. مدنسمع أخبارك وتعليقاتك هالأيام؟
قال لي عابسا: يا أخبار .. يا تعليقات هالأيام ! آني دا أفكر بغير أشياء !
سألته: مثلا ؟
قال:
دا أفكر شحصلنا من هالحكومة ومن البرلمان خلال السنة الفاتت ؟ يعني يوصل
بينا الحال ندور ورة النواب حتى يجون يداومون ووزارات بلا وزراء وأوضاع
عجيبة غريبة محد يصدك لو يسمعها !
سألته مجددا: شكو بيها إذا جم نايب غايب و وزارة أو وزارتين وزرائها ما يداومون ، ترة الغايب عذره وياه !
ضحك
مقهقها وقال: شنو جم نايب غايب ؟ هذولة النواب باجر يطالبون بكل حقوقهم
وهمة ناسين حقوق الشعب و متكلي جم وزارة ما بيها وزير حتى لو جان موكدها
ولا شغلته ؟ إبني إحنا حاربنا صدام حتى نخلي الشعب والعراق يتقدم و يلحّك
بالعالم. ترة إحنا تخلفنا تخلف ما إله أول ولا إله تالي ! تصدك إحنا ليهسة
ما عدنه أرقام سيارات لأن ما متفقين شلون تصير الأرقام ؟ تصدك إحنة ليهسة
شوارعنا مفلشة والوعود صاعدة نازلة من البرلمان والحكومة والجميع توعدنا
بالمستقبل المزدهر ؟ وين الأزدهار ؟ وين العمران ؟ وين القوانين التي أعيد
النظر بيها ؟ وين تعويضات المتضررين ؟ وين الخدمات ؟ وين و وين و وين ؟ ترة
الشعب كلشي ما حصل لحد الآن كلها وعود بوعود والحجة هية هية .. الأرهاب
والوضع الأمني
سألته مجددا: وشتقترح ؟
إيتسم
بحزن وقال: المسألة طبيعية ، إذا تجيب مقاول يشتغل ببيتك بفلوسك ويطلع
شغلة موزين أو فات عليه سنة وهو ما مشتغل أي شي وتارك الوضع يتدهور شتسويلة
؟
قلت له مقاطعا: أطرده من بيتي ومن الشغل وأجيب غير واحد يشتغللي ؟
أجابني: إذاً إنت تكول نطرد البرلمان ونجيب غيره ، صح لو لا ؟
قلت مجيبا: ليش لا ؟
قال:
إذاً لازم نجيب غير برلمان ، يعني لازم ننتخب مجلس جديد وبما أن الموعد
للأنتخابات الجديدة وتبديل مجلس النواب راح يكون سنة 2010 يعني لازم نتحمل
بعد ثلث سنين خرابيط وتخلف لو نبدل البرلمان أحسن؟
قلت مؤيدا: نعم لكن شلون نبدل البرلمان وننتخب غير مجلس ؟
قال:
بسيطة ، يستخدم رئيس الجمهورية أو الحكومة وحسب صلاحياتهم بحل المجلس قبل
وقته يعني حسب الصلاحيات ، وكذلك يكدر المجلس نفسه يحل نفسه إذا عنده إحساس
بالديصير ولو آني ما أتوقع هذا الحل يجي من المجلس لأن هذا المجلس لما قدم
لكل عراقي عيدية 10 آلاف دينار قدم لكل عضو بالمجلس بنفس الجلسة قرض بمبلغ
50 مليون دينار ! إذاً إلمن ديشتغل هذا المجلس ؟
سألته: يعني تقصد حل المجلس وإيقاف صلاحياته لحين إنتخاب مجلس جديد ؟ يعني نجمد الدستور ونشكل حكومة إنقاذ وطني ؟
قال
متعجبا: شنو هالحجي ؟ هاي شعليها بهاي ؟ ليش نجمّد الدستور ؟ يبقى الدستور
ماشي وتبقى الوزارة مستمرة على وضعها لتصريف الأعمال بلا صلاحية إلى أن
نختار وزارة جديدة وتستلم من الوزارة القديمة. الشي الوحيد اللي يصير هو
مجلس النواب اللي راح ما يجتمع وهو أصلا أكثر الوقت ما مجتمع ويمكن لو كان
النواب مقتنعين بنفسهم ما يخافون من إنتخابات جديدة لجان طالبوا بحل
البرلمان والأيام راح تبين شنو رأي العراقيين ووضعهم وإلمن راح ينتخبون !!
فكرت
بكلمات هذا العجوز الذي كان يأتينا بالأفكار الجديدة دائما وكانت أفكاره
دائما تنسجم وواقع حياتنا ومشاكلنا . إن حل المجلس هو فكرة جيدة للتخلص من
المأزق الحالي وما دمنا في أول الطريق لبناء وطن وعراق جديد فإن علينا أن
نتعامل مع هذا المطلب بواقعية ومرونة ونكران ذات. أما إذا كانت العنجهية
والعصبية والتعصب هي التي تحكم أعضاء المجلس الحالي فإنهم لن يوافقوا على
حل نفسهم من أجل العراق.
علينا
أن نطالب بحل المجلس الحالي لإخراج العراق من أزمته الحالية وإطلاق عجلة
التقدم والبناء على أيدي مجلس جديد لا تحكمه الإحصائيات الطائفية أو
العنصرية حيث اصبح الواجب إيقاف خسارة الزمن والوقت من الأستمرار مع ضرورة
إعادة النظر بأسلوب الأنتخاب ولنا في هذا السبيل موضوع لاحق إن شاء الله.
ليست هناك تعليقات:
إرسال تعليق